छोटुभाई पटेल हायस्कूलमध्ये शालेय क्रीडा स्पर्धांचा उत्साह; कबड्डी सामन्याने रंगला जल्लोष
चंद्रपूर :
आदर्श शिक्षण मंडळ संचालित छोटुभाई पटेल हायस्कूल, चंद्रपूर येथे आज दि. २९ नोव्हेंबर रोजी शालेय क्रीडा स्पर्धांचे भव्य व उत्साहपूर्ण उद्घाटन करण्यात आले. विद्यार्थ्यांमध्ये क्रीडास्पर्धांची उमेद आणि ओढ पाहता संपूर्ण शाळा क्रीडामय वातावरणाने सजली होती.
उद्घाटन समारंभाला आदर्श शिक्षण मंडळाचे कोषाध्यक्ष अतुल पटेल, सचिव जीतूभाई पटेल, मुख्याध्यापिका सौ. कांत मॅडम, मंडळाचे सदस्य व उपमुख्याध्यापक राजीव मानकर, तसेच पर्यवेक्षक विशाल निंबाळकर आदी मान्यवर उपस्थित होते. मान्यवरांच्या उपस्थितीमुळे विद्यार्थ्यांचे मनोबल अधिक उंचावले.
कार्यक्रमाची सुरुवात सरस्वती माता आणि स्व. छोटूभाई पटेल यांच्या प्रतिमेला माल्यार्पण घालून व दीपप्रज्वलन करून करण्यात आली. यानंतर मुख्याध्यापिका सौ. कांत मॅडम यांनी विद्यार्थ्यांना प्रोत्साहित करताना सांगितले की क्रीडा आपल्यामध्ये शिस्त, संघभावना, नेतृत्वगुण आणि निरोगी स्पर्धात्मक वृत्ती विकसित करते.
यानंतर विद्यार्थ्यांनी उत्साहपूर्ण मार्च-फास्ट सादर केला. रंगीबेरंगी ध्वज, तालबद्ध पावले आणि घोषणांनी वातावरण दणाणून गेले. उद्घाटनानंतर झालेल्या कबड्डी सामन्याने कार्यक्रमाला विशेष रंगत आली. खेळाडूंची चपळाई, जोश आणि संघभावना पाहून प्रेक्षकांनी टाळ्यांचा कडकडाट केला. विद्यार्थ्यांच्या ‘कबड्डी-कबड्डी’च्या घोषणांनी मैदान दुमदुमून गेले.
शाळेत पुढील दोन दिवस विविध क्रीडा स्पर्धांचे आयोजन करण्यात आले असून विद्यार्थ्यांनी सर्व स्पर्धांमध्ये उत्साहपूर्ण सहभाग नोंदवला आहे. विजेत्या विद्यार्थ्यांना प्रमाणपत्रे व बक्षिसे प्रदान करण्यात येणार आहेत.
शेवटी उपस्थित मान्यवरांनी विद्यार्थ्यांना क्रीडेत सक्रिय राहण्याचे आवाहन केले. क्रीडा म्हणजे केवळ विजय नसून निरोगी स्पर्धा, आनंद आणि चारित्र्य घडविण्याचे माध्यम आहे, असा संदेश त्यांनी दिला.
--
Tags
chandrapur

