⚫ चंद्रपूर : भाजपचे ‘नारी शक्ती’ प्रेम निवडणुकीपुरतेच? महिला आरक्षणाच्या नावाखाली ‘गॅरिमेंडरिंग’चा कुटील डाव – खासदार प्रतिभा धानोरकर यांचा जोरदार हल्लाबोल
चंद्रपूर, १९ एप्रिल २०२६ : केंद्रातील भाजप सरकार महिला आरक्षणाचा फक्त आभासी प्रचार करून महिलांची दिशाभूल करत असल्याचा गंभीर आरोप खासदार प्रतिभा धानोरकर यांनी आज केला. २०२३ च्या विधेयकाला काँग्रेससह सर्व विरोधी पक्षांनी पूर्ण पाठिंबा दिला होता, तरीही भाजपने आरक्षणाला जनगणना आणि मतदारसंघ पुनर्रचनेच्या जाचक अटींमध्ये अडकवून महिलांच्या हक्कांची पायमल्ली केल्याचा त्यांचा दावा आहे.
प्रतिभा धानोरकर यांनी एका पत्रकाद्वारे सांगितले की, “भाजपचा खरा हेतू महिलांना अधिकार देणे नसून, हे आरक्षण अनिश्चित काळासाठी प्रलंबित ठेवणे हाच आहे. सरकार केवळ राजकीय लाभासाठी हा वेळकाढूपणा करत आहे.”
खासदारांनी आणखी एक गंभीर आरोप केला. ते म्हणाले, “महिला आरक्षणाच्या नावाखाली सरकार विद्यमान मतदारसंघांच्या सीमा बदलून स्वतःला फायदेशीर ठरेल असे बदल करत आहे. राजकीय भाषेत याला ‘गॅरिमेंडरिंग’ म्हणतात. भाजपला अनुकूल असे मतदारसंघ तयार करण्याच्या या कुटील डावामुळेच सर्व विरोधी पक्ष एकत्र आले आहेत.”
त्यांनी केंद्र सरकारवर जनगणना जाणीवपूर्वक लांबणीवर टाकल्याचा आरोपही केला. “जनगणना आणि मतदारसंघ पुनर्रचना पूर्ण होईपर्यंत आरक्षण लागू होणार नाही, ही अट घालणे म्हणजे देशातील स्त्रीशक्तीची क्रूर थट्टा आहे. हे आरक्षण २०२९ ची वाट न बघता तत्काळ लागू करावे,” अशी मागणी धानोरकर यांनी केली.
ओबीसी, एससी, एसटी समाजाच्या हक्कांवरही त्यांनी प्रकाश टाकला. “देशाची जनगणना लांबणीवर टाकणे हा केवळ तांत्रिक मुद्दा नाही, तर ओबीसी समाजाच्या घटनात्मक हक्कांवरचा जाणीवपूर्वक आघात आहे. पारदर्शक जनगणना शिवाय वंचित घटकांना न्याय मिळणे शक्य नाही,” असे त्यांनी स्पष्ट केले.
महिला आरक्षणात ओबीसी महिलांसाठी स्वतंत्र कोटा न दिल्यास हा कायदा खऱ्या अर्थाने सर्वसमावेशक ठरणार नाही, असा ठाम सूर त्यांनी व्यक्त केला. “ओबीसी भगिनी सत्तेच्या मुख्य प्रवाहापासून वंचित राहतील. जातनिहाय जनगणना होऊन प्रत्येकाला न्याय मिळेपर्यंत काँग्रेसचा सनदशीर लढा सुरूच राहील,” असे धानोरकर यांनी जाहीर केले.
अखेरच्या आवाहनात त्यांनी भाजपला खडेबोल सुनावले: “केवळ निवडणुकीपुरते ‘नारी शक्ती’चे गुणगान गाणाऱ्या भाजपने आता प्रत्यक्ष कृतीतून महिलांना त्यांचा हक्क द्यावा.”
खासदार प्रतिभा धानोरकर यांच्या या परखड विधानाने महाराष्ट्रासह देशभरात राजकीय चर्चेला उधाण आले आहे. महिला आरक्षण, जनगणना आणि ओबीसी आरक्षण या मुद्द्यांवर विरोधक आणि सत्ताधारी यांच्यातील संघर्ष अधिक तीव्र होण्याची चिन्हे आहेत.